आमदार अमोल जावळे यांच्या समयसूचकतेमुळे शेळगाव बॅरेज १००% भरण्याच्या हालचालींना वेग.
(महाराष्ट्र राज्य सहसंपादक सुरेश पाटील यावल)
यावल दि. ६ ऑक्टोबर
यंदा अपुऱ्या पावसामुळे भविष्यात निर्माण होणाऱ्या संभाव्य पाणीटंचाईची गांभीर्यांने दखल घेत,रावेर विधानसभेचे आमदार अमोलदादा जावळे यांनी दाखवलेल्या समयसूचकतेमुळे शेळगाव बॅरेज पूर्ण क्षमतेने भरण्याची प्रत्यक्ष कार्यवाही सुरू झाली आहे. या सकारात्मक निर्णयामुळे यावल तालुक्यासह तापी नदीकाठच्या शेतकरी वर्गात समाधान व्यक्त केले जात असून सर्वत्र कौतुकास्पद चर्चा सुरू आहे.
आमदार अमोल जावळे यांची समयसूचकता व तत्परता ---
यंदा पावसाचे प्रमाण कमी राहिल्याने आगामी काळात शेती व पिण्याच्या पाण्याची तीव्र टंचाई भासू नये,यासाठी आमदार अमोलदादा जावळे यांनी तातडीने हालचाली करत तापी पाटबंधारे विकास महामंडळाकडे लेखी पत्रव्यवहार केला.शेळगाव बॅरेजमध्ये यावर्षी १०० टक्के क्षमतेने पाणीसाठा करण्यात यावा,अशी आग्रही मागणी त्यांनी या पत्राद्वारे केली.आमदारांच्या पत्राची तात्काळ दखल घेत जळगाव मध्यम प्रकल्प विभाग क्रमांक २ कडून बॅरेज भरण्याच्या प्रत्यक्ष कार्यवाहीला सुरुवात करण्यात आली आहे.
शेतीसाठी सिंचनाचा मोठा आधार व भूजल पुनर्भरण --
शेळगाव बॅरेज पूर्ण झाल्यानंतर मागील पाच वर्षांत विविध कारणांमुळे त्यात पूर्ण क्षमतेने पाणी साठवले जात नव्हते.मात्र, यंदा आपल्या आमदार अमोल दादा यांच्या पाठपुराव्यामुळे बॅरेज पूर्ण क्षमतेने भरले जाणार असल्याने तापी नदीकाठच्या व बॅरेज परिसरातील शेतकऱ्यांना उपसा सिंचनासाठी मोठा दिलासा मिळणार आहे.
तसेच विस्तीर्ण जलसाठ्यामुळे परिसरातील विहिरी व कूपनलिकांच्या भूजलपातळीत मोठी वाढ होऊन भूजल पुनर्भरणाला गती मिळणार आहे.
सध्याची स्थिती व पाणी पातळीतील वाढ :
सध्या शेळगाव बॅरेजची पाणीपातळी १७७ मीटरवर पोहोचली असून,आगामी दिवसांत ती आणखी १ ते २ मीटरने वाढण्याची शक्यता आहे. यामुळे संपूर्ण शेळगाव जलाशय पूर्ण क्षमतेने भरणार आहे.
तालुक्यात व शेतकरी वर्गात सकारात्मक चर्चा ---
शेतकऱ्यांच्या पाण्याचा प्रश्न अत्यंत ऐरणीवर असताना आमदार अमोलदादा जावळे यांनी दाखवलेली राजकीय, सामाजिक शेतकऱ्यांच्या हिताची दूरदृष्टी आणि तातडीने केलेला पाठपुरावा यामुळे बागायतदार व शेतकरी वर्गात उत्साहाचे वातावरण आहे.संकट येण्यापूर्वीच योग्य नियोजन केल्याबद्दल तालुक्यात त्यांच्या या निर्णयाची आणि कार्यतत्परतेची जोरदार चर्चा सुरू आहे.
