मोबाईलच्या विळख्यातून मैदानाच्या मोकळ्या श्वासाकडे; तळोदेकरांनी पेरली नव्या पिढीसाठी 'संस्कारांची शिदोरी'!कैलास शेंडे विभागीय संपादक नंदुरबारथर्टी फर्स्टच्या रात्री जेव्हा जग डीजेच्या तालावर आणि पाश्चात्य संस्कृतीच्या झगमगाटात हरवले होते, तेव्हा नंदुरबार जिल्ह्यातील तळोदा शहराने मात्र संपूर्ण राज्याला आदर्श ठरेल असे 'संस्कारांचे लेणे' कोरले आहे. शंकर नगर आणि काशीराम नगर येथील रहिवाशांनी एकत्र येत, आपल्या पाल्यांना मोबाईलच्या आभासी जगातून बाहेर काढून मातीच्या खेळांची गोडी लावण्यासाठी एका आगळ्यावेगळ्या नववर्षाचे स्वागत केले. आजची पिढी तासनतास मोबाईलच्या स्क्रीनसमोर बसून शारीरिक आणि मानसिकदृष्ट्या कमकुवत होत असताना, तळोद्यातील पालकांनी घेतलेला हा पुढाकार म्हणजे काळाची गरज आहे. "केवळ पुस्तकी किडा नको, तर मैदानावरचा वाघ घडवा" हा संदेश या उपक्रमातून स्पष्टपणे देण्यात आला. या सोहळ्यात केवळ मुलेच नाही, तर त्यांचे आई-वडील आणि आजी-आजोबा देखील मैदानात उतरले होते. गोट्या आणि भोवरा. कबड्डी, खो-खो आणि रस्सीखेच.विटी-दांडू, लगोरी आणि आट्यापाट्या. मामाचे पत्र, आंधळी कोशिंबीर आणि टायर पळवणे. या उपक्रमाचे सर्वात मोठे यश म्हणजे नव्या पिढीच्या डोळ्यांत दिसलेला कुतूहलाचा आनंद. आपल्या मुलाला महागडा फोन देण्यापेक्षा त्याला मैदानात नेऊन घाम गाळायला शिकवणे, हाच त्यांच्या भविष्यासाठी सर्वात मोठा 'इन्व्हेस्टमेंट' प्लॅन आहे, हेच या निमित्ताने सिद्ध झाले.नंदुरबारच्या या 'तळोदा पॅटर्न'ची चर्चा आता संपूर्ण जिल्ह्यात होत असून, आपल्या मुलांच्या भविष्याची काळजी करणाऱ्या प्रत्येक पालकासाठी ही बातमी डोळे उघडणारी ठरणार आहे."आम्ही आमच्या मुलांना केवळ संपत्ती देऊन चालणार नाही, तर त्यांना आमची संस्कृती आणि निरोगी आयुष्याची गुरुकिल्ली असणारे खेळही दिले पाहिजेत. हा उपक्रम केवळ एका दिवसाचा उत्सव नसून ती एक चळवळ आहे."