प्रधानमंत्री आवास योजना लाभार्थ्यांच्या वाढीव ५० हजार रुपयांच्या अनुदानासाठी वैभव घाटे यांचे मुख्यमंत्री देवेंद्र फडणवीस यांना निवेदन!
मारोती एडकेवार
जिल्हा प्रतिनिधी नांदेड
नांदेड :प्रधानमंत्री आवास योजना (ग्रामीण) अंतर्गत घरकुल मंजूर झालेल्या पात्र लाभार्थ्यांना वाढीव ५० हजार रुपयांचे अनुदान मिळावे, यासाठी गंजगाव येथील सामाजिक कार्यकर्ते वैभव माधवराव घाटे यांनी महाराष्ट्राचे मुख्यमंत्री देवेंद्र फडणवीस यांना ई-मेलद्वारे निवेदन सादर केले आहे. पात्र लाभार्थ्यांना शासन निर्णयानुसार अतिरिक्त अनुदानाचा लाभ मिळावा, तसेच या संदर्भातील अडचणी दूर करण्यासाठी संबंधित प्रशासनाला आवश्यक सूचना द्याव्यात, अशी विनंती या निवेदनातून करण्यात आली आहे महाराष्ट्र शासनाच्या ग्रामविकास विभागाने शासन निर्णय क्रमांक : प्रआयो-२०२५/प्र.क्र.०४/योजना-१०, दिनांक ४ एप्रिल २०२५ रोजी प्रधानमंत्री आवास योजना (ग्रामीण) टप्पा-२ अंतर्गत अतिरिक्त अनुदानासंदर्भात निर्णय घेतला आहे. या निर्णयानुसार, सन २०२४-२५ मध्ये प्राप्त उद्दिष्टांमधून मंजूर घरकुल लाभार्थ्यांना राज्य शासनाच्या हिश्यातून अतिरिक्त ५० हजार रुपयांचे अनुदान देण्यास मान्यता देण्यात आली आहे.
ग्रामीण भागातील गरीब आणि गरजू कुटुंबांना स्वतःचे हक्काचे घर मिळावे, या उद्देशाने प्रधानमंत्री आवास योजना (ग्रामीण) राबविण्यात येते. मात्र, बांधकाम साहित्याच्या किमती, मजुरी आणि इतर खर्चात वाढ झाल्याने अनेक लाभार्थ्यांना घरकुलाचे बांधकाम पूर्ण करताना आर्थिक अडचणींचा सामना करावा लागतो. अशा परिस्थितीत शासनाने मंजूर केलेल्या अतिरिक्त अनुदानाचा लाभ वेळेत मिळणे महत्त्वाचे ठरते.
याच पार्श्वभूमीवर वैभव माधवराव घाटे यांनी मुख्यमंत्री कार्यालयाकडे निवेदन पाठवून वाढीव अनुदानाच्या अंमलबजावणीचा विषय मांडला आहे. शासन निर्णयानुसार पात्र असलेल्या लाभार्थ्यांना अतिरिक्त रक्कम मिळावी आणि अनुदान वितरणात अडथळे असल्यास त्यांची तपासणी करून नियमानुसार कार्यवाही करण्यात यावी, अशी मागणी त्यांनी निवेदनातून केली आहे.
घरकुल लाभार्थ्यांच्या अनुदानासंदर्भातील प्रकरणांचा संबंधित जिल्हा परिषद आणि पंचायत समिती स्तरावर आढावा घ्यावा. पात्र लाभार्थ्यांच्या प्रकरणांमध्ये काही प्रशासकीय किंवा तांत्रिक अडचणी असल्यास त्या दूर करण्यासाठी आवश्यक मार्गदर्शन करावे. तसेच लाभार्थ्यांना त्यांच्या अनुदानाची सद्यस्थिती समजावी, यासाठी संबंधित यंत्रणेने स्पष्ट माहिती द्यावी, अशी विनंती निवेदनात करण्यात आली आहे.
वाढीव अनुदानाबाबत मंजूर तरतुदींची अंमलबजावणी करताना पात्र लाभार्थ्यांची प्रकरणे प्रलंबित राहू नयेत, याकडे प्रशासनाने लक्ष द्यावे, अशी अपेक्षा वैभव घाटे यांनी व्यक्त केली आहे.
वाढीव ५० हजार रुपयांच्या अनुदाना बाबत वैभव माधवराव घाटे यांनी मुख्यमंत्री देवेंद्र फडणवीस यांना ई-मेलद्वारे निवेदन सादर केले आहे
