**पाडळसे महाशिवपुराण कथा: पत्रकारांसाठी बैठक व्यवस्था नसल्याने तीव्र नाराजी****भव्य आयोजनात माध्यम प्रतिनिधींची उपेक्षा; वार्तांकन करताना पत्रकारांना कसरत**** पाडळसे (ता. यावल) | वार्ताहर**पाडळसे-अकलूद शिवारात सुरू असलेल्या आंतरराष्ट्रीय ख्यातीचे कथाकार पंडित प्रदीपजी मिश्रा यांच्या 'श्री शिवमहापुराण' कथेच्या पहिल्याच दिवशी नियोजनातील त्रुटी समोर आली आहे. या भव्य सोहळ्याचे वार्तांकन करण्यासाठी आलेल्या पत्रकारांसाठी आयोजकांकडून कोणतीही स्वतंत्र बैठक व्यवस्था करण्यात आली नसल्याने पत्रकारांनी तीव्र नाराजी व्यक्त केली आहे.**माध्यम प्रतिनिधींची गैरसोय**कथेसाठी लाखो भाविकांची गर्दी होत असताना, या सोहळ्याला प्रसिद्धी देणाऱ्या माध्यम प्रतिनिधींसाठी व्यासपीठासमोर किंवा प्रेस गॅलरीमध्ये बसण्याची कोणतीही सोय करण्यात आली नव्हती. अनेक पत्रकारांना उभ्याने किंवा गर्दीतून मार्ग काढत वार्तांकन करावे लागले. आंतरराष्ट्रीय स्तरावर या कथेचे प्रक्षेपण होत असताना स्थानिक पत्रकारांच्या बैठकीकडे दुर्लक्ष केल्याने आश्चर्य व्यक्त होत आहे.**नियोजनावर प्रश्नचिन्ह**कथेपूर्वी घेतलेल्या पत्रकार परिषदेत चोख नियोजनाचे दावे करण्यात आले होते, मात्र प्रत्यक्ष कथा सुरू झाल्यावर पत्रकारांना साधी बसण्याची जागाही उपलब्ध करून देण्यात आली नाही. वार्तांकन करताना येणाऱ्या अडचणींबाबत पत्रकारांनी आयोजन समितीकडे विचारणा केली असता समाधानकारक उत्तर मिळाले नाही, यामुळे पत्रकारांमध्ये संतापाची लाट पसरली आहे.**प्रशासनाचे लक्ष वेधण्याचा प्रयत्न**जिल्हाधिकारी आणि पोलीस प्रशासनाने आढावा बैठक घेऊनही, माध्यम प्रतिनिधींच्या मूलभूत व्यवस्थेकडे आयोजकांनी दुर्लक्ष केल्यामुळे या प्रकरणाची चर्चा कथास्थळी रंगली आहे. आगामी दिवसांत पत्रकारांसाठी स्वतंत्र आणि सुव्यवस्थित बैठक व्यवस्था करण्यात यावी, अशी मागणी उपस्थित पत्रकारांनी केली आहे.
byमीडीया पोलीस टाईम
-
0