🔴 मनुदेवी मंदिरात मध्यरात्री चोरट्यांचा धुमाकूळ!देवीच्या चांदीच्या मुकुटांसह छत्र्यांवर डल्ला; १ लाख ३५ हजारांचा ऐवज लंपासगेटचे कुलूप तोडून गाभाऱ्यात प्रवेश; फॉरेन्सिक पथकाकडून तपासणी, पोलिसांकडून चोरट्यांचा शोध सुरू

🔴 मनुदेवी मंदिरात मध्यरात्री चोरट्यांचा धुमाकूळ!

देवीच्या चांदीच्या मुकुटांसह छत्र्यांवर डल्ला; १ लाख ३५ हजारांचा ऐवज लंपास

गेटचे कुलूप तोडून गाभाऱ्यात प्रवेश; फॉरेन्सिक पथकाकडून तपासणी, पोलिसांकडून चोरट्यांचा शोध सुरू

कोरपावली | प्रतिनिधी : फिरोज तडवी

सातपुडा पर्वताच्या कुशीत वसलेल्या श्रीक्षेत्र मनुदेवी मंदिरात अज्ञात चोरट्यांनी धाडसी चोरी केल्याने परिसरात एकच खळबळ उडाली आहे. ६ ऑगस्टच्या रात्री मंदिर बंद असताना चोरट्यांनी मुख्य प्रवेशद्वाराचे कुलूप तोडून गाभाऱ्यात प्रवेश केला. यावेळी मनुदेवी व रेणुका मातेच्या मूर्तीवरील चांदीचे मुकुट आणि छत्र्या असा सुमारे १ लाख ३५ हजार रुपये किमतीचा ऐवज लंपास करण्यात आला.

कुलूप तोडून थेट गाभाऱ्यात प्रवेश

६ ऑगस्ट रोजी सायंकाळी साडेपाच वाजता मंदिर नेहमीप्रमाणे बंद करण्यात आले होते. रात्रीच्या सुमारास अज्ञात चोरट्यांनी मंदिराच्या मुख्य चैनल गेटचे कुलूप तोडले. त्यानंतर गाभाऱ्यातील लाकडी दरवाज्याचा कडी-कोंडा तोडून चोरट्यांनी आत प्रवेश केला.

गाभाऱ्यात प्रवेश केल्यानंतर चोरट्यांनी मनुदेवी मातेच्या मूर्तीवरील सुमारे ३०० ग्रॅम वजनाचा चांदीचा मुकुट तसेच २०० ग्रॅम वजनाची चांदीची छत्री लंपास केली. त्यानंतर रेणुका मातेच्या मूर्तीवरील सुमारे ३०० ग्रॅम वजनाचा चांदीचा मुकुट व २०० ग्रॅम वजनाची चांदीची छत्री चोरून नेली. दोन्ही देवींच्या दागिन्यांचे एकूण वजन सुमारे एक किलो असून, त्याची किंमत सुमारे १ लाख ३५ हजार रुपये असल्याचे सांगण्यात आले.

सकाळी उघडकीस आला चोरीचा प्रकार

७ ऑगस्ट रोजी सकाळी सातच्या सुमारास मंदिराचे पुजारी व सेवक मंदिर उघडण्यासाठी आले. त्यावेळी मुख्य गेट व गाभाऱ्याच्या दरवाज्याचे कुलूप तुटलेले दिसून आले. आत पाहणी केली असता देवींच्या मूर्तीवरील चांदीचे दागिने गायब असल्याचे निदर्शनास आले. त्यानंतर तत्काळ मंदिर संस्थेच्या पदाधिकाऱ्यांना माहिती देण्यात आली.

आडगाव येथील रहिवासी शिवाजी प्रभाकर पाटील यांच्या फिर्यादीवरून यावल पोलीस ठाण्यात चोरीचा गुन्हा दाखल करण्यात आला आहे.

वरिष्ठ पोलिस अधिकाऱ्यांची घटनास्थळी धाव

घटनेची माहिती मिळताच फैजपूर विभागाचे पोलीस उपअधीक्षक अनिल बडगुजर तसेच यावल पोलीस ठाण्याचे पोलीस निरीक्षक रंगनाथ धारबळे यांनी तातडीने घटनास्थळी भेट देऊन पाहणी केली. मंदिरातील गाभारा, मुख्य प्रवेशद्वार आणि परिसराची तपासणी करून चोरीबाबत माहिती घेण्यात आली.

दरम्यान, तपासासाठी मोबाईल फॉरेन्सिक पथक घटनास्थळी दाखल झाले. पथकाने घटनास्थळावरील उपलब्ध पुरावे व इतर बाबींची तपासणी केली. चोरट्यांनी मंदिरात कोणत्या मार्गाने प्रवेश केला, चोरीनंतर कोणत्या दिशेने पलायन केले आणि परिसरात त्यांच्या हालचाली झाल्या का, याचा तपास पोलिसांकडून सुरू आहे.

पोलीस उपअधीक्षक संदीप गावित यांचीही पाहणी

जळगाव जिल्हा पोलीस उपअधीक्षक संदीप गावित यांनीही मनुदेवी मंदिर परिसराला भेट देऊन चोरीच्या घटनेची माहिती घेतली. मंदिराच्या सुरक्षेच्या दृष्टीने आवश्यक उपाययोजनांबाबतही पाहणी करण्यात आली.

मंदिर सुरक्षेचा मुद्दा ऐरणीवर

श्रीक्षेत्र मनुदेवी हे परिसरातील हजारो भाविकांचे श्रद्धास्थान आहे. वर्षभर येथे भाविकांची मोठी वर्दळ असते. अशा धार्मिक स्थळी चोरीची घटना घडल्याने मंदिर सुरक्षेचा प्रश्न पुन्हा ऐरणीवर आला आहे.

मंदिर परिसरात कडक सुरक्षा व्यवस्था, पुरेशी प्रकाशयोजना आणि सक्षम सीसीटीव्ही यंत्रणा उभारण्यात यावी, अशी मागणी भाविकांकडून होत आहे. पोलिसांनी चोरीचा तातडीने छडा लावून आरोपींना जेरबंद करावे आणि चोरीस गेलेला ऐवज परत मिळवावा, अशी अपेक्षा भाविकांनी व्यक्त केली आहे.