मुख्य क्राईम रिपोर्टर महाराष्ट्र राज्य:
सामान्य जनतेचे रक्षण करणारी 'खाकी' आज स्वतःच भ्रष्टाचाराच्या चिखलात रुतल्याचे अत्यंत धक्कादायक चित्र पुन्हा एकदा समोर आले आहे. तेलंगणा पोलीस दलातील निलंबित डीएसपी संकीरेड्डी भीम रेड्डी यांच्या घरावर आणि इतर ८ ठिकाणांवर अँटी करप्शन ब्युरोने (ACB) टाकलेल्या छाप्यात तब्बल ३०० कोटींपेक्षा अधिक रुपयांची बेहिशेबी माया आणि नोटांचे बंडल जप्त करण्यात आले आहेत. अवघ्या २७ वर्षांच्या सेवेत एक साधा कॉन्स्टेबल थेट अब्जाधीश डीएसपी बनतो, हा प्रवास केवळ पदोन्नतीचा नसून, पोलीस प्रशासनातील सडलेल्या आणि लाचखोर व्यवस्थेचा जिवंत पुरावा आहे.
कायदा रक्षकांचेच 'लुटारू' रूप!
सामान्य माणसाने तक्रार करायची कुणाकडे? हाच मोठा प्रश्न या कारवाईमुळे निर्माण झाला आहे. संकीरेड्डी भीम रेड्डी यांनी २७ वर्षांच्या सेवेत कोट्यवधी रुपयांचे साम्राज्य उभे केले. ८ वेगवेगळ्या ठिकाणांवर जेव्हा एसीबीच्या पथकाने छापे टाकले, तेव्हा सापडलेले नोटांचे बंडल पाहून अधिकारीही थक्क झाले. जमिनीचे खरेदीखत, सोन्या-चांदीचे दागिने आणि अलिशान बंगले... हे सर्व एका पोलीस अधिकाऱ्याने कायद्याचे रक्षण करताना कमावले की कायद्याचा लिलाव करून? असा संतप्त सवाल आता विचारला जात आहे.
पोलीस प्रशासनातील लाचखोरी
- हप्तेखोरी आणि वसुलीची कीड: ही घटना म्हणजे पोलीस प्रशासनाला लागलेली भ्रष्टाचाराची कीड किती खोलवर गेलेली आहे याचे उत्तम उदाहरण आहे. गुन्हेगारांना जेरबंद करण्याऐवजी, त्यांच्याशीच हातमिळवणी करून 'हप्तेखोरी' चे साम्राज्य चालवले जात असल्याचे यातून स्पष्ट होते.
- वरपासून खालपर्यंत साखळी: एका साध्या कॉन्स्टेबलचे डीएसपी पदापर्यंत पोहोचणे आणि एवढी प्रचंड संपत्ती गोळा करणे, हे वरिष्ठ पाठीशी असल्याशिवाय शक्य नाही. पोलीस दलातील ही भ्रष्टाचाराची साखळी वरपासून खालपर्यंत कशी मजबूत आहे, यावरच या घटनेने शिक्कामोर्तब केले आहे.
- खाकीचा धाक की पैशांचा माज? पोलिसांचा धाक गुन्हेगारांवर असायला हवा, पण आज परिस्थिती अशी आहे की, सामान्य माणूस पोलिसांकडे जायला घाबरतो आणि गुन्हेगार पैशांच्या जोरावर पोलिसांना खिशात घेऊन फिरतात. प्रामाणिक अधिकाऱ्यांची गळचेपी आणि भ्रष्ट अधिकाऱ्यांना राजाश्रय, हेच आजच्या व्यवस्थेचे विदारक सत्य बनले आहे.
'सिंघम' फक्त पडद्यावर, रिअल लाईफमध्ये 'भ्रष्टाचाराचे डॉन'!
चित्रपटात खाकी वर्दीची शान आणि प्रामाणिकपणा दाखवला जातो, मात्र रिअल लाईफमध्ये भीम रेड्डींसारखे अधिकारी खाकीला काळीमा फासत आहेत. एका बाजूला तुटपुंज्या पगारावर २४ तास ऊन-पावसात प्रामाणिकपणे ड्युटी करणारा सामान्य अंमलदार आहे, तर दुसऱ्या बाजूला पदाचा गैरवापर करून ३०० कोटींची संपत्ती गोळा करणारे असे उच्चपदस्थ अधिकारी आहेत.
आता वेळ आली आहे की सरकारने केवळ 'निलंबन' किंवा 'बदली' सारख्या जुजबी कारवाया न करता, अशा भ्रष्ट अधिकाऱ्यांची संपत्ती जप्त करून त्यांना थेट तुरुंगाची हवा दाखवली पाहिजे. पोलीस प्रशासनाचे शुद्धीकरण झाल्याशिवाय जनतेचा कायद्यावरील विश्वास परत येणार नाही, हे मात्र नक्की!
