*चला पुन्हा जगूया ते दिवस’!…*
*भद्रावतीत मैत्रीचा अनोखा मेळावा*
*आनंद, श्रद्धांजली आणि संस्कृतीचा भावस्पर्शी मिलाफ*
महेश निमसटकर
महाराष्ट्र राज्य विशेष कार्यकारी संपादक भद्रावती चंद्रपुर
भद्रावती प्रतिनिधी -काळाच्या अथांग प्रवाहात प्रवाहाविरुद्ध पोहत, मैत्रीच्या जुन्या नौकेला पुन्हा एकदा आठवणींच्या किनाऱ्यावर आणणारा एक विलक्षण सोहळा २ मे रोजी भद्रावतीच्या मातीत संपन्न झाला. जिल्हा परिषद हायस्कूल, भद्रावती येथील १९९०-९१ या शैक्षणिक वर्षातील दहावीच्या विद्यार्थ्यांनी आपल्या मैत्रीचा परिघ विस्तारत, यंदा केवळ मित्रच नव्हे तर 'सपरिवार' एकत्र येत एक नवा आदर्श घालून दिला आहे.
गेल्या दोन वर्षांपासून सुरू असलेल्या या स्नेहमेळाव्याचे हे सलग तिसरे वर्ष होते. मात्र, यंदाचे मुख्य आकर्षण ठरले ते म्हणजे मित्रांसोबत आलेले त्यांचे जीवनसाथी आणि मुले. ३४ वर्षांपूर्वीची ती निखळ मैत्री आजच्या पिढीलाही कळावी आणि सर्व कुटुंबे एका धाग्यात गुंफली जावीत, या उद्देशाने या मेळाव्याला एका भव्य 'कौटुंबिक संमेलनाचे' स्वरूप प्राप्त झाले होते. बगडे वाडी येथील गुरुदेव लॉनवर जणू काही 'जुन्या घराण्याचे' पुनर्मिलनच झाले होते.
सोहळ्याची सुरुवात ज्ञानज्योती सावित्रीबाई फुले यांच्या प्रतिमेला माल्यार्पण करून करण्यात आली. यावेळी आनंदाच्या वातावरणातही मैत्रीची संवेदनशीलता दिसून आली. सावली येथील वर्गमैत्रीण ज्योती धारणेवार यांच्या पतीच्या दुःखद निधनाबद्दल सर्वांनी भावपूर्ण श्रद्धांजली वाहिली. सुखात सोबत असणारी मैत्री दुःखाच्या प्रसंगीही पाठीशी उभी असते, याची प्रचिती यावेळी आली.गप्पागोष्टींसोबतच मुलांसाठी खेळ, कुटुंबासाठी सांस्कृतिक कार्यक्रम आणि जुन्या शालेय जीवनातील आठवणींचे भावस्पर्शी सादरीकरण करण्यात आले. "चला, पुन्हा एकदा तेच सोनेरी दिवस जगूया" हा सूर यावेळी प्रत्येकाच्या मनात निनादला. ३४ वर्षांच्या प्रदीर्घ प्रवासानंतर पुन्हा एकदा त्याच उत्साहाने भेटल्यामुळे भद्रावती शहर मैत्रीच्या रंगात न्हाऊन निघाले होते.हा ऐतिहासिक सोहळा यशस्वी करण्यासाठी आशिष ठेंगणे, राजेश बदखल, सुभाष बांदूरकर, रमण राखुंडे, सुनीता खंडाळकर, विणा जुनघरे, विनोद लोहकरे, संजय कोमेजवार, गणेश बोबडे, संतोष कोंगरे, सुनील देठे, रेखा गेडाम, भास्कर मोघे आणि धम्मपाल पेटकर या सर्व सहकाऱ्यांनी अहोरात्र परिश्रम घेतले.हा मेळावा केवळ स्नेहभोजन न ठरता, निखळ मैत्रीचा आणि कौटुंबिक जिव्हाळ्याचा एक अविस्मरणीय उत्सव ठरला.
----- बॉक्स ----
*गुणांचा गौरव आणि यशाचा सत्कार*
या मेळाव्यात आपल्या कर्तृत्वाने नाव कमावणाऱ्या वर्गमित्रांचा मोठ्या अभिमानाने सत्कार करण्यात आला ज्यात विविध राज्यस्तरीय पुरस्कारांनी सन्मानित लेखक गोपाल शिरपूरकर यांचा विशेष सत्कार करण्यात आला आणि नगर परिषद निवडणुकीत नगरसेविका म्हणून लोकप्रतिनिधी बनलेल्या कविता सावनकर यांचा गौरव झाला त्याचबरोबर तंत्रज्ञानाच्या युगात विदर्भस्तरीय 'सिल्वर प्ले बटन' मिळवून यश संपादन करणाऱ्या संजय कोमेजवार यांचा सुपुत्र स्वराज याच्या कौतुकाने सर्वांची छाती अभिमानाने फुलून आली.
