शासकीय रुग्णालयात बहिणीच्या मृत्यूने संताप!..
वैद्यकीय निष्काळजीपणाचा आरोप; दोषींवर कारवाई न झाल्यास १७ सप्टेंबरला पालकमंत्र्यांच्या उपस्थितीत आत्मदहनाचा बालाजी गायकवाड यांचा इशारा..
मारोती एडकेवार
जिल्हा प्रतिनिधी नांदेड
नांदेड : डॉ. शंकरराव चव्हाण शासकीय वैद्यकीय महाविद्यालय व रुग्णालय, विष्णुपुरी येथे कुटुंब नियोजन शस्त्रक्रियेसाठी दाखल केलेल्या बहिणीचा उपचारादरम्यान मृत्यू झाल्याचा आरोप करीत संबंधित डॉक्टर व कर्मचाऱ्यांची निष्पक्ष चौकशी करून कायदेशीर कारवाई करावी, अशी मागणी रातोळी, ता. नायगाव येथील बालाजी श्रावण गायकवाड यांनी केली आहे. कारवाई न झाल्यास दि. १७ सप्टेंबर २०२६ रोजी मराठवाडा मुक्ती संग्राम दिनी नांदेड येथे पालकमंत्री अतुल सावे यांच्या उपस्थितीत आत्मदहन करण्याचा इशारा त्यांनी निवेदनाद्वारे दिला आहे.गायकवाड यांच्या निवेदनानुसार, त्यांची बहीण शिल्पा भीमानंद वाघमारे (वय ३० वर्षे) यांना दि. १३ ऑगस्ट २०२६ रोजी कुटुंब नियोजन शस्त्रक्रियेसाठी रुग्णालयातील वॉर्ड क्रमांक १६ मध्ये दाखल करण्यात आले होते. दि. १४ ऑगस्ट रोजी सकाळी सुमारे ७ वाजता इंजेक्शन दिल्यानंतर काही क्षणांतच शिल्पा यांच्या तोंडातून फेस आला व त्या पलंगावरून खाली पडल्याचा दावा निवेदनात करण्यात आला आहे.यानंतर उपस्थित डॉक्टर व नर्स यांनी त्यांना उचलून पलंगावर झोपविले. प्रकृती गंभीर झाल्यानंतर त्यांना वॉर्ड क्रमांक १९ मध्ये हलविण्यात आले. मात्र, सकाळी सुमारे ९ वाजता वैद्यकीय पथकाने रुग्ण मयत झाल्याची माहिती कुटुंबीयांना दिल्याचे निवेदनात नमूद आहे.
या घटनेबाबत कुटुंबीयांनी रुग्णालय प्रशासनाकडे विचारणा केली असता, शवविच्छेदन होऊ द्यावे व अहवालानंतर पुढील कार्यवाही करण्याचे आश्वासन मिळाल्याचे बालाजी गायकवाड यांनी सांगितले. त्यानंतर दि. १५ ऑगस्ट २०२६ रोजी दुपारी सुमारे १.३० वाजता शिल्पा वाघमारे यांचे शवविच्छेदन करण्यात आले.
दरम्यान, या प्रकरणाची नांदेड ग्रामीण पोलीस ठाण्यात नोंद असून, तपास पोलीस उपनिरीक्षक ज्ञानेश्वर भोसले यांच्याकडे असल्याचे निवेदनात नमूद करण्यात आले आहे.
दोषींवर कारवाईची मागणी
दि. १४ ऑगस्ट रोजी वॉर्ड क्रमांक १६ व १९ येथे कर्तव्यावर असलेल्या डॉक्टर व स्टाफच्या निष्काळजीपणामुळेच बहिणीचा मृत्यू झाल्याचा आरोप बालाजी गायकवाड यांनी केला आहे. मृत्यूचे नेमके कारण आणि उपचारादरम्यान घडलेली संपूर्ण घटना निष्पक्ष चौकशीतून समोर आणावी व दोषी आढळणाऱ्यांवर कायदेशीर कारवाई करावी, अशी मागणी त्यांनी केली आहे.
पालकमंत्र्यांच्या उपस्थितीत आत्मदहनाचा इशारा
दि. १७ सप्टेंबर २०२६ रोजी मराठवाडा मुक्ती संग्राम दिनानिमित्त नांदेड येथे ध्वजारोहणासाठी जिल्ह्याचे पालकमंत्री अतुल सावे उपस्थित राहणार असल्याचे नमूद करत, त्यांच्या उपस्थितीत आत्मदहन करण्याचा इशारा बालाजी गायकवाड यांनी दिला आहे. बहिणीच्या मृत्यू प्रकरणात तातडीने न्याय मिळावा आणि दोषींवर कायदेशीर कारवाई व्हावी, अशी त्यांची मागणी आहे.
निवेदनाच्या प्रती जिल्हाधिकारी, पोलीस अधीक्षक, पोलीस उपमहानिरीक्षक, आरोग्य विभागातील वरिष्ठ अधिकारी, रुग्णालय प्रशासन तसेच संबंधित पोलीस अधिकाऱ्यांना देण्यात आल्याचे अर्जदाराने नमूद केले आहे.
“बहिणीच्या मृत्यूचे सत्य समोर यावे आणि दोषींवर कायदेशीर कारवाई व्हावी,” अशी मागणी बालाजी श्रावण गायकवाड यांनी केली आहे.
टीप : वैद्यकीय निष्काळजीपणाबाबतचे आरोप हे अर्जदाराच्या निवेदनावर आधारित आहेत. या आरोपांबाबतचा अंतिम निष्कर्ष अधिकृत चौकशी व वैद्यकीय अहवालानंतर स्पष्ट होणे अपेक्षित आहे.
